Irabazi-Ganemos ekimena Aretxabaletan ere aurkeztuko da Udal hauteskundeetan eta alkategaia Luis Gomez da (Arrasate, 1968). Aretxabaletan bizi da azken 20 urteotan eta Coprecin egiten du lan. Ezker Anitza-IUko kidea da eta lehengoz izango da zerrendaburua.

"Uste dut berriketari utzi eta zerbait egiten hasteko ordua dela, pausu bat aurrera eman, inplikatu eta eredu kapitalista hau aldatzen hasteko ordua", jakinarazi du Gomezek eta horregatik aurkeztu da. "Zintzotasuna eta zuzentasuna" eskainiko duela ekimenak dio, eta zera gaineratu du: "Herritarren parte-hartzea bultzatuko dugu, eta kontsulta bidez hartuko ditugu erabakiak; izan ere, Udal aurrekontua, inbertsioak eta antzeko kontuak herritarrek erabaki behar dituzte".